八點鐘已到集合地點，仲有時間可以嘆個麥當當早餐……
之後就係『加士居道勞資審裁處』坐 118 巴士過海……
然後於『柴灣道鯉魚門公園站』下車，接著係原站等 14 號巴士往『大潭龜背灣』下車……
我哋差不多九點半就到喇！原來係位於紅山半島旁邊……
落車之後，還要走一段路仔，最後落埋條樓梯……
……終於到喇！
多得背住鏡頭嗰兩位Aunt，晨運咁早就嚟到霸位，霸得有大樹遮蔭，梗有兩張石枱方便放置食物及杯碟用具……BBQ爐在最右方，唔駛慌被熱氣或煙火燻倒……
小妹：『契仔你一個人响度做乜野呀??』
契仔：『又未有得食，又無得游水住，咪睇吓個海先囉！』
前面就係救生員嘅瞭望亭，士多店等……洗手間及沖身地方喺相片右方，無入鏡噃……
呢隻就係載住我啦、契仔啦及契仔表姐出浮台嘅大海龜喇！多得佢、同埋多得拖住隻龜出去嘅一干人等，當然包括契仔嗲媽啦！
好彩契仔嗲連腳踏氣泵都帶埋嚟，否則都唔知點吹脹佢……
擾攘一輪，等到第三組人到達，我哋就開始燒雞翼、生蝦、元貝、豬扒、牛扒、煨粟米、各類香腸、各式丸子、各適其適……陸續第四及第五組人都已到達，食得差不多嘅我哋，便開始下海了，等其他後來者亦可以開始燒野食……
從浮台返來，作中場休息，大朋友竟然帶埋兩隻海胆返嚟……
忽然見到有如此安心嘅父母……BB女瞓得好甜呢！
查實此BB女嘅爸媽帶咗佢家姐出去玩水，淨係留底隻忠心嘅小狗响度看守住D財物及BB女，一睇就知只有外籍人仕先會咁做啦！
開心嘅時間過得特別快，玩到五點幾，大家都筋疲力盡，除咗大、小朋友外，終於要收拾行裝回程喇！
呢處係紅山半島隔離嘅豪宅，好似係大潭道一號掛！
差不多六點出到銅鑼灣，太陽仍掛在中天……
幸好星期一攞咗假，可以抖番吓……皮膚明顯深色咗，好彩揸咗太陽油，皮膚無晒傷……記得上次去泰國布吉，就係因為唔記得揸太陽油，一個早上，背脊及兩隻小腿就晒燶咗，紅卜卜一隻燒豬，但第二日仲要去鳥蛋島玩噃！同埋做SPA噃……真係有苦自己知喇！
大家都係去港島附近，我就石澳，你就紅山半島.....haha
回覆刪除個個星期都有家庭樂？個浮泡幾得意....hehe
[版主回覆08/06/2008 10:58:00]平時少D，遇著契仔放暑假，佢地去郊遊時又肯帶埋我呢個大鄉里去，梗係奉陪啦！
全靠呢隻大龜，我先可以去到浮台咋！
依日真係不錯喎~你都幾鐘意BBQ嗎
回覆刪除好似已經去左2次~依次去龜背灣好似都幾遠
不過D水都好ok喎~哈哈~辛苦晒隻水泡龜
原來帶到咁多人出海~真係好似龜仙人呢
係呀~果家人又會真係咁放心~果隻狗似玩狗多點
唔知識唔識保護人咁喎~始終大狗or狼狗就放心好多
[版主回覆08/06/2008 14:09:00]咁啱遇著契仔嗲媽有時間，咁咪一齊去玩吓囉！好幾年都無燒過野食，今年一次過補番數囉！
我都好耐冇呢類型的活動啦,我件泳衣都唔知去左邊lu.
回覆刪除[版主回覆08/06/2008 14:16:00]唔緊要，即刻走去買件新嘅，仲有呢……我哋興响件泳衣上面加多件T-恤，用嚟遮住D豬腩肉呀！
我都好耐無游水，我自己都有肚腩仔，可能一出海已經沉入海底
回覆刪除[版主回覆08/07/2008 21:54:00]有個肚腩咪唔驚沉囉，一定浮o架！唔駛驚！