天寒地凍

天氣話下降至13度，而家都未覺好凍，各位網友要多加衣裳，以免凍親。

可以的話沖些蜜糖水飲吓，咁樣會無咁乾，最慘係D皮膚，感到乾燥異常，好彩還可以用蜜糖來做滋潤臉膜，塊臉先見得吓人咋！

公司今年大縮水，往年公司都會由上至下於平安夜攪個自助午餐，抽吓獎，然後安排提早放工走人。今年呢！竟然公告天下，由各部門自己攪慶祝午餐，根據每人$1XX嘅津貼，聖誕後向會計部CLAIM番錢，本應都無問題嘅！咪自已部門D人一齊慶祝囉！但好事多磨，又唔知邊過設計將全公司分成幾組，夾埋一齊攪慶祝，話會玩得更開心！更不幸係嗰D要同全公司大班一齊慶祝嘅部門，肯定有得食就食，人哋講你就笑好喇！

回程篇

歡樂嘅時刻終會過去，又是踏上回程的日子。早餐過後，便往白之戀人朱古加工場去。

一入門口，就會見到不同國家的人愛吃朱古力的程度。

由於已到過兩次，所以今次並沒有走得太多地方，只隨便逛逛便坐到餐廳嘆響住已久的美味糕點，價錢地不貴，在售票機買了票便可以去拿食物了，有套餐賣，仲好抵添，一杯飲品+三件自選嘅蛋糕只需要¥1000，如果一杯飲品+一件蛋糕呢，都係¥650，單買一件CAKE呢，就要¥350喇！我哋咪顧住買顧住食，無影到D靚靚蛋糕相囉！

呢張係館內其中收蔵有紀念價值嘅杯。我鐘意佢金光閃閃！

呢套係立體播放嘅影片，入面嘅小朋友會在場境中移動，佈境就一早SET定，全日語介紹朱古力的製作。

可能為了使我可以真正感受到大雪紛飛的美景，連日來她都大方地飄揚，到最後一天，她更狠狠地下著大雪，襯托得四週景緻特別美。

於千歲OUTLET吃過午飯，便繼續在場內逛蕩，美中不足，就是穿著厚厚的羽絨褸，入到店內，就要把褸除下，試衫就更不方便，除、除、除、著著著，攪成十幾分鐘，試完出來成個癲婆咁，終於放棄唔試、唔買，齋睇算了。慳番唔少。

就係咁，北海道五天嘅旅程就在大雪飄遙下完結了。其實今次行程都安排得很輕鬆，有兩晚都早早安排我們返酒店浸溫泉後才吃自助晚餐，今次大部份境點都相同，所以沒有驚奇，除了吃之外，所買嘅手信亦不多，响ＦＡＮＣＬ、ＤＨＣ及ＵＮＩＱＵＥ都有斬獲。

唔覺唔覺都寫咗五個旅行網誌，下一個我想寫熱辣辣嘅泰國，咁會覺得無咁凍吖嘛！



 

滑雪篇

滋滋油油第四日喇，今日會去滑雪囉！早上雲層得厚。

看看，早上七時嘅氣溫係-9度呀！好彩，我係响上午十時拍嘅。

一副武裝，先到小山坡上試練，基本由上向下滑是沒有難度的，哈哈！困難係點樣可以停啦，點樣企定定唔郁啦，同點樣著住對雪橇行番上山，仲有要响山坡下拖回用具上山坡呢就最辛苦喇。我玩咗個幾鐘，就急不及待要走去餐廳食飯及休息番吓！

下午嘅行程，亦係最期待的，就係去狸小路喇，今次由大通嗰邊嘅金井、丸井行番去狸小路，去完三越買生果後，再喺地下街嘆理個Tea-set先集合。

晚餐係鐵板燒，每組人有一間房，白飯任裝，但食物就不能添，當然我哋有加餸啦！兩塊神戶牛柳(鐵板燒)和一隻飽魚(用清酒煮)，仲有sapporro啤酒，おいしい！

登別篇

早上浸完溫泉返房，見到窗外面境色一片灰。

今日係舊地重遊。

熊牧場：遠看有珠火山，赤色依舊，輕煙縷縷。

佢哋得意過D大熊。

買了些蘋果及餅乾去喂熊仔。一隻隻俾人喂慣咗，簡直懶過一條蟲。若食物拋係佢身體以外的地方，佢望都唔會望，亦唔會去執番嚟食，佢只會企定定等你再拋過俾佢。

睇吓啦！幾識嘆，懶過一條蟲呀！

俾我啦！拋俾我啦！

有勢力嘅熊當然佔據著有利位置啦！

登別地獄谷：走了一段路，亦落過谷底“地藏尊菩薩”，可惜遊人很多，拍不到好的照片。

忍者村：今次逗留咗兩小時左右，睇過忍者show、玩過忍者屋及鬼怪屋便離開了，當日總共有成七、八團人一齊觀看忍者show，而全部都係屬於同一間旅行社的，當然包括我哋嗰團都係啦。

正門位置。

園內境色。

洗手間位置，門前堆滿雪，要小心奕奕行入去。

跟住就去食海鮮火鍋，地點喺太平洋海邊一個叫“白老”嘅地方，食海鮮鍋梗係唔少得長腳蟹啦！仲有北寄貝、帶子、海胆；到最後仲煮埋蟹粥添，唔好睇咁少野，隻蟹唔細o架！總之就食得好飽啦，開年嘛！

本來响室內食到熱辣辣，吃飽後走到餐廳後面透透氣，面對著太平洋，下著大雪，加上大風吹，很快就把熱氣驅散了，仲覺得凍添！

跟住就一早返菓子王國酒店，俾足夠嘅時間俾我哋去游吓水、浸吓溫泉，佢溫泉區嘅面積係我所見過最大嘅，有室外及室內，室內有不同的溫泉池，例如梅溫泉、櫸木溫泉、又有桑拿房，房內有一大桶海鹽，供人們擦上身，加速排汗及當埋磨沙囉！簡直一樂也。

一間非常大嘅房，右手邊係床、中間係梳化、左手邊係電視櫃。

從房向外望的夜境。

然後先慢慢去食自助餐，可能因為四、五點就天黑，所以覺得日間好快就過，反而係慢慢長夜。

小樽篇

今日有3度，可惜天陰陰，早上先到小樽運河，第二次响冬天到訪，上次係初雪時，今次係隆冬後，路上的雪已被踏到變冰，要好小心行走，否則會變大冬瓜，哈哈！

逛過了北一哨子館、北菓樓、音樂博物館後，便決定去飲咖啡了，因為懶囉！坐係窗前睇住D雪飄著落嚟，幾靚呀！

午餐過後，便去坐雪上電單車，我第一次玩咋！沿途無落雪，風也不大，沒有上山，只在小高原及小路行駛，可惜雪地不夠鬆，車開得快時，人會被抛起，我差D跌咗落車，有個團友仲翻了車添。實在驚險刺激，但又好好玩噃。

大年初一晚入住洞爺洞萬世閣酒店，於酒店吃自助晚餐時，仲同場加插放煙花助興呢！