暑假期間，想與大、小靈精一起出外走走，吸吓新鮮嘅空氣，便相約好安答夫婦一家與媽子於星期六到西貢一日遊。當天早上還在下雨，想不到下午陽光竟晒得非常猛烈。
再一次到訪『西貢獅子會自然教育中心』，所以今次只影一些特別嘅照片，多數時候，都跟大靈精研究如何拍攝一張照片，大個女喇，開始有自己嘅思想同主見了。
荷塘入面的一朵小蓮，尤於陽光太猛，所以張相爆咗光……
荷塘裡較大嘅蓮花……
呢朵叫『雞蛋花』，中間淺粉色，花瓣邊係深粉紅色，花瓣嘅生長好似一個風車葉咁，一片片從中心轉出來……
新鮮地上波蘿……袖珍型??
赤靈芝???
行吓行吓……竟然俾小靈精發現……呢隻有保護色嘅青蛙，最後都被小靈精嚇走咗，因為他不停在叫：『爸爸，有隻青蛙，快D影，佢走喇……』
中場休息，嘆番杯冰凍嘅汽水，平時好少俾佢地飲晒一杯o架！今日見佢地晒到紅卜卜都無扭計，等佢地開心吓囉！
响間茶室入面，竟然發現咗呢個溫度及濕度計……古董??
接著，我地就離開教育中心，往西貢墟出發，先走到碼頭，再一直往沙灘那邊走，沿路都有好多大大、小小o架狗帶著主人來散步，有D仲跑到海裡去涼快一下呢……
正當我哋响退潮嘅沙灘上面行吓行吓……小靈精又發現了呢粒海星……估唔到佢嘅觀察力都幾強吖！可惜唔喺响學業上囉……
邊到有得玩，佢地都第一時間發現……
水邊有三隻鴨鴨响到等緊乜野呢，有隻仲望住我噃！
終於行返入市集……見到賣木傢俬嘅店舖……好有懷舊FEEL……
跟住就見到呢隻"紅燒龍蝦"浮床??
同埋"海龜先生"浮床?? 仲有超大型水泡呢！
你估呢張係咩嚟吖??
係一張"方便櫈"，摺起嚟只係一塊板咁，容易收藏，我覺得最啱就係俾去釣魚D人用喇！
行完一日，大家都肚仔餓，咁我哋一行六人就行咗去……天后廟嗰邊間街坊酒樓坐定定食飯喇，今晚嘅菜式有：
上湯會龍蝦﹒清蒸瀨尿蝦﹒清蒸鮑魚仔﹒燒乳鴿﹒琵琶豆腐﹒
魚香茄子﹒仲有未出現嘅…清蒸海上鮮﹒清炒靚菜心﹒白飯六碗
埋單多謝780大元，經濟實惠，連媽子都讚話好……食飽飯，慢慢行返去巴士總站打道回府了，大、小靈精疲態盡現，一上車就打瞌睡了……
夏天都幾哂，不過你去教育中心都係睇下d田野同花，西貢多海鮮食，應該唔會太辛苦，我就會入秋後開始才行山....
回覆刪除[版主回覆07/22/2008 22:44:00]行山好吖，吸收大自然嘅氧份，身體又健康D！你係同朋友一齊去?? 定參加D行山團呢??
依家好多行山朋友都結左婚，有d剛剛生左，有d大緊肚，有d要照顧小朋友，所以少左行，多數都係一個，不過自己都係行近近地既地方，或者去一d地方影下相e.g.南生圍 etc..... 係呢，你小朋友幾可愛，讀小學未呀
回覆刪除[版主回覆07/25/2008 00:21:00]係我嘅姪女、姪仔噃，佢地兩個梗可愛啦！ 大靈精升四年級，小靈精升二年級……我呢個姑姐都希望可以喺暑假多D帶佢地出去走走……
南生圍聽得多，其實係咩地方嚟呢！易唔易去o架?? 我有時一個人嘅時候，唔知做咩好都幾悶o架！
搭西鐵到元朗站在沿村路行十分鐘就去到南生圍，有荒廢既魚塘，有白樺樹小徑，好到盡頭可以望到米埔，我都去過好多次影相，所以暫時唔會再去．
回覆刪除[版主回覆07/28/2008 00:19:00]唔該晒……遲D試吓去先！