電話公司小插曲

話說噚晚整理家居繳費信件時，發現一封電話公司寄嚟嘅合約，話新合約已於六月二十二日生效，新優惠收費係：每月回贈＄１１ 之後仲要俾＄９９月費，另加送每月100分鐘IDD。

我即時問媽子；幾時接過做續約安排嘅電話??  媽子話早兩個星期，電話公司職員打嚟話就快到期，要續約嘞……當時對方仲話送乜、送乜，媽子都醒目話樣樣都唔要，淨係要減收費啫，跟住對方就話可以幫佢安排減費……但又無清楚講明而家收費同之前收費有出入……

聽完媽子咁講，隨即打去電話公司，按咗一輪掣，再等咗一陣先有人聽。

我己經開門見山同對方講：份新合約收費比上次貴，可唔可以跟番上次一樣每月回贈＄２２，另再每月送100分鐘IDD。(其實都係費O架！)

但佢就話：之前嘅同事應該有講清楚咗續約嘅內容，舊嘅優惠已經冇咗喇！

咁我就話：……如果唔可以跟番上次嘅收費，我就唯有唔用你地嘅服務……

但佢竟然話：份合約已經生效咗，如果要取消服務，即係毁約，就要俾手續費。

我聽到之後，即時三把火，就同佢講：你哋同事做續約嗰時都無講清楚解釋俾老人家知，而家仲要收手續費先可以終止合約??

我要求佢將電話轉駁至當值主管跟進，跟住又等咗一陣之後，就話經理未能即時接聽我電話，著我留低電話，並一定會於兩小時內回覆我……

收線後，我心有不甘，即刻搵番上次份合約出嚟望吓，啍！點知就俾我發現…嘿嘿…唔駛一個鐘，佢地個經理就打嚟喇……

我一開始就問佢：麻煩你幫我CHECK吓，上一次份合約係幾時生效嘅??

經理話：哦！係舊年五月生效……

跟住我再問佢：唔！我舊年份約係簽咗１８個月嘅，咁應該幾時到期呢?！

經理就咦咦哦哦：……１８個月，咦…即係……呀…

我就接住講：即係今年十一月先到期啦！我而家要投訴你公司，第一、無清楚講解，及誤導老人家合約到期要續約，第二、提早終止我之前嘅合約優惠，令到我有損失，第三、新合約收費增加咗，又提早咗，簡直係雙重損失……

最後，經理好主動咁安排番舊收費俾我，而合約就照喺番六月生效。其實我都唔想做衰人o架，不過而家百物騰貴，慳得一蚊得一蚊嘛！