一年容易又中秋

唔經唔覺，大、小靈精及契仔嘅暑假又放完，踏入九月份就開學了，進入一個新學年，希望他們全部都學業進步，默書考試樣樣掂啦！

下個星期尾已經係中秋喇，而家喺街頭、巷尾都會見到月餅速銷……只要係酒樓，就一定有月餅賣，只要係雪糕店，亦一定會有雪糕月餅賣，絕無走雞，連冰皮月餅嘅味道都層出不同，由經典口味至意大利咖啡芝士、楊枝金露、甚至奶茶味、及貴價嘅燕窩都有……

我覺得冰皮月餅就好似草餅一樣，我個人就不喜愛，始終是傳統式月餅較好，若然送禮，金華火腿月或者雙黃白蓮蓉都唔錯吖……不過人老咗，就不再似大、小靈精般，見到月餅就口水流兼嚷著要切來吃，現在只會輕嚐，並會配合濃茶一杯來消消滯呢！

一連三日嘅中秋節假期，相信又是短線遊嘅好機會，聽聞今年內地也有中秋節假呢！