話咁快，就到咗第五日嘞！
今朝吃過早餐後，全團人便高高興興地前往手信店，梗係啦！等咗咁多日終於等到買地道手信嘅時候，之前唔係無野賣，只不過你唔會買舊"金"或買粒"鑽石"做手信掛?！
店內商品包羅萬有：木雕品~~由裝飾到實用嘅杯、碟、筷子樣樣都有；
天然水晶製品~~首飾品啦，有大有細嘅水晶樹啦；
鴕鳥蛋~~經畫師在蛋上繪上有關動物、或風景嘅藝術品；
當地土人~~嘅打獵用品、樂器呀咁囉；
除咗有皮製品外，仲有唔知係兔仔吖、定狐狸腳賣啦，亦有獅子爪賣添~~當地土人認為若掛上獅子爪將會帶俾佢好運喎……
就係咁就玩咗一個上晝……午飯响手信店附近嘅廣場食中國菜，係自費嘅，我哋叫咗個六人套餐，埋單都係R450(蘭特)，個個都食得好飽……
跟住我哋就坐咗幾粒鐘嘅車程向『獅子林』及『太陽城』進發嘞！
『獅子林』，其實係一個人工飼養獅子嘅地方，好似話呢D獅子大咗之後會賣俾其他國家嘅動物園喎！
呢兩隻已經戒咗奶，開始咬骨頭喇……
趁佢咬緊骨頭，心驚驚咁走埋去影張相先……
嗱！呢隻就未戒奶，咁遊客就可以抱起佢影張相留念，好似貓仔咁得意o架！
『太陽城』又稱"迷城"，係南非最著名嘅渡假勝地！內有四座豪華酒店；以六星級嘅"迷城皇宮酒店"最出名，"迷城"內有大型賭場、人工造浪泳池及游泳池、大型歌舞表演、亦可以參加酒店安排嘅野外體驗或者騎吓馬咁吖……
皇宮酒店內有一條叫"時間大橋"的地方，兩旁係一隻隻嘅大象雕像，橋尾有一幅很高嘅石牆，牆上雕刻咗好多動物嘅型態，每隔一個鐘，條橋就會震動，好似地震咁，仲會係地下嘅裂縫冒上煙霧，再配合四周大象嘅叫聲，都幾特別，有好多人包括我哋都專登响度等佢地震……
大家先嚟睇吓佢點靚法啦！(相片經網上轉載)
其中一間酒店，"迷城皇宮"嘅外貌……
呢條就係"時間大橋"……
其中一個酒店內嘅泳池……
屬於"迷城皇宮"內嘅泳池……
迷城皇宮內嘅人工湖，建築物係餐廳同酒店房……
晚上"太陽城"入口嘅景緻……
晚間泳池景色……
噴水池……
待續……
晨早起床，06:45集合後便住機場出發，往『約翰內斯堡』去……今朝個早餐由酒店供應餐盒，於車上派發，都好豐富O架……有生果啦、三文治、同紙包飲品，我記得以後都無試過係晨早要離開酒店時，會有早餐送埋俾你食。點知上到機，仲可以有多次早餐食呢！
南非境內有三個首都，其中一個行政首都~~普利托利亞~~就位於約翰內斯堡內，係南非最大嘅一個商業及金融中心，亦是世界上最大嘅產 "金" 地點，我們於市內觀光了教堂廣場、一些建築物、及總統府。
總統府分左、右兩邊大樓，正中間對落就係一遍大花園草地……
跟著，我哋就去咗呢間裝修得好似火車咁嘅餐廳食"百獸宴"，當日我係無乜點食野嘅，因為MENU有：大象肉、駝鳥用、兔肉、鱷魚肉、野豬肉，鯊魚、魔鬼魚等等……我只吃了少少水牛肉，野豬及野雞肉便算了！
飯後，就去咗『舊黃金礦場』，並由當地導遊帶領下，乘升降機直到地下二百多公尺深嘅礦坑參觀，看看當年礦工嘅工作地方及環境。
返回地面後，再即席目睹由高溫溶解咗嘅金漿，於室溫五秒內凝固成金塊嘅表演，表演過後，仲可以俾觀賞者試吓用雙手抱起一舊重12.5公斤嘅金磚影相留念，但若果你係大加士，可以用兩隻手指就挾得起佢嘅話，舊金磚就送埋俾你添，可惜小妹用盡九牛二虎之力，都抱唔起佢離開枱面……真無用！
第二日嘅天氣不太好，沒有猛烈嘅陽光，卻披上一層薄霧，我哋首先坐船出海，去睇一個住滿海獅嘅『海獅島』，我哋只能在船上作非常之近嘅距離觀看，如此近距離接觸，不單聽到海獅羣震耳欲聾嘅叫聲，仲嗅到一陣陣從島上飄過來嘅腥臭味，簡直作嘔嘅感覺……
接著，便往『雀鳥公園』，公園地方很大，而其中有些雀鳥被飼養在一個很大籠入面，而遊人係可以親身進入籠裡欣賞當中嘅雀鳥，記憶中，我入過〝貓頭鷹〞及〝鷹〞嘅籠，因為一隻就注視著我直至我離開，一隻就係我頭上飛過，嚇餐死！
佢係一隻好大、好大嘅天鵝公，可能我當日著咗件黃色衫剌激到佢，每當我嘗試走近籠邊，佢就反起對翼，大聲地叫並走到籠邊，跟著我行左、行右，成羣天鵝入面，只有佢對我有如此反 應咋……
南非企鵝，比澳洲嘅神仙企鵝大隻D，佢地已經習慣咗炎熱嘅天氣，如果送佢地返冰天雪地，佢地會凍死o架……
一隻色彩鮮艷嘅山鷄??
跟住就前往『企鵝灘』，佢地就係住响沙灘嘅泥窿度，同樣於近距離觀看時，不時傳來陣陣腥臭味……
午飯就係海灘附近嘅餐廳，有羅宋湯、芝士焗龍蝦+煎魚柳、及溶得好快嘅雪糕做甜品。
之後我哋就繼續行程，向『好旺望』出發嘞，讀書嗰時都有讀過呢個地方，佢係响大西洋與印度洋嘅交匯處，但唔知到原來係响南非。
車子由山腳一直〝Z〞字型咁駛上山頂，山頂上有間細細地嘅商店賣紀念品，最重要係座燈塔，此塔由來久遠，她的燈光，畫破黑夜，無間地引領船隻安全航行……可惜當天遇著大霧籠罩，能見到有限，燈塔外貌亦只能朦朧看見……亦看不到大西洋及印度洋嘅英姿，浪費了大好機會，唯有從山路慢慢走到山腰嘅〝Cape Point〞，與及南非嘅天涯海角拍照留念。
記得嗎? 曾經係"電波少年"嘅起步點！
我後面就係大西洋嘞！係天之涯海之角……有點〝我是誰?！及人在何方??！！〞嘅感慨……
咁就花咗一個下午，返回市區己經係食晚飯嘅時候，今晚食全〝鮑〞宴，菜餚豐富，頭盤有鮑魚絲沙律，然後係一隻要用刀义品嚐嘅鮮鮑，上次喺澳洲自費品嚐後，呢次係第二次咋……剧完隻鮑魚都飽咗七成，仲有其他煎、炆、煮、炒嘅餸菜都係用鮑魚做配料嘅，全部只得輕嚐，非常膩呢。
當眾人飲飽食醉離開時，基於安全理由，需要由食店聘請嘅保安員，荷槍實彈地護送我哋到街口上車……
六個人，帶著三部相機出發喇……目前我只存有自己相機嘅菲林，所以未能把全程相片上載……
首先坐夜機，去星加坡，然後再轉機去約約翰內斯堡，接著再乘內陸機往開普敦，全程連等候時間，差不多花成19.5鐘，但一點也不辛苦，有得玩點會辛苦吖！？
到達嘅時間己經係第二日，當地時間上午09:00，她比香港慢咗六粒鐘！
落機喇，第一感覺就係D人嘅膚色真係好黑o架，第二就係，機場係平房建築，係排隊過移民局時，已可以望到機場大堂外的耀眼陽光，第三就係，當地人工作的效率係慢、慢、慢……
第一個景點就係去參觀『鴕鳥園』兼食午飯，一望無際嘅鴕鳥園，太陽晒得頭頂可煎蛋，地面也發滾，但都不阻礙我哋第一次近距離接觸鴕鳥及餵飼牠，仲可以試吓騎鴕鳥、同企响鴕鳥蛋上面添，可是汗水流不多，因為太乾燥了，而且當站在樹蔭下，就會覺得非常涼快。午餐係地道鴕鳥扒+炒鴕鳥蛋，第一次食鴕鳥肉感覺麻麻，又硬又乾。
佢D眼睫毛好長，好靚o架！
好似跑馬咁，為駝鳥帶上頭罩，拉佢入閘……
就响呢處，讓團友們體驗免費騎鴕鳥的樂趣……
跟住就吊車站，坐一架會作360度自轉嘅吊車上『桌山』嘞，山如其名，從遠處觀看，桌山山頂極像一張大枱，但到達山頂，始發覺岩石處處，遠眺羣山，也是由岩石組成的。
光禿禿的山頭，只得石頭及小量灌木……
隨後便返酒店稍作休息作出外吃晚飯，當晚入住六星級嘅『桌灣酒店』，梳洗過後，已急不及待跑到酒店旁嘅V&T Shopping Mall，商場佔地很廣，所賣的，大部份都是手工藝品、首飾、當地特式食品~~肉乾《大部份都係黑漆漆、好硬嘅、多是一條條，但唔知係咩野肉嚟》……
從房間向外望，接近黃昏陽光伯伯仍然努力地晒……
從酒店望向桌山，山頂果真平坦如桌……
晚飯食中菜，我哋仲加咗一隻大鮮飽及一打細Size嘅貴妃蚌添……
~~
~~
~~天氣炎熱，亦非常乾燥，紫外線指數係"強"，但於樹陰下更覺涼風輕吹……
~~
~~
~~
尤於當然都未興數碼相機，我所有嘅相都係用菲林晒出嚟，直至最近發現菲林不能久存，唯有攞咗去做數碼化，整成光碟，又可以post出嚟俾大家睇睇！都唔錯吖……