記：年初四

大年初四

明天就開工喇！今日都係晏晝先出發，先去契仔家拜年，契仔得嗰三歲人仔，不過脾氣都好嗅，好似今日開頭同佢都玩得好地地，玩玩吓都唔記得佢做咩事突然發脾氣，又喊又叫又扔野，仲連佢亞媽都打埋，最後仲好硬頸唔睬我，連我走嗰時都唔同我SAY GOODBYE。

唉！依家D小朋友真無禮貌，無計啦父母要返工，家中只得個老人家，同工人『賓賓』，『賓賓』只會幫你照顧小朋友，係唔會幫你敎佢嘅，老人家只會鍚住或遷就個小朋友，亦唔會幫你教佢嘅，咁父母返到嚟嗰少少時間又教唔到咁多，結果咪變成咁囉！長氣咗添……

離開契仔後，便入去好妹妹家拜，咁啱佢老爺、奶奶、大哥、大嫂都入咗去佢度拜年，又係熱熱鬧鬧，咁先似過年吖嘛！

與妹妹夾手夾腳煮咗白汁意粉、粟米湯、買咗燒味、又煮咗D生菜咁啦，最後還有好好味嘅寧波湯丸同暖胃嘅薑湯，又係好豐富嘅一餐，連續四日都不停咁食…食…食，之後都唔知點減番。

 

記：年初三

大年初三

話咁大就到咗年初三，天氣仍然寒冷，坐响客廳睇電視，就覺得越睇越凍，終於要開個暖包來取暖，我都覺得有點跨張！

午飯後，便外出到朋友家拜年兼打邊爐，打邊爐前嘅節目就係打麻雀，不過成十幾人，只開咗一檯，其餘嘅人就睇電視或者好似我咁做旁觀者囉！打到成八點先開餐。

當晚有雲吞、水餃、好多肥牛、長腳蟹、大丸小丸、豆苗、皇帝菜、金菇、粟米等等……

唔知係咪天氣凍，胃口特別好，加上飲咗少少酒，情緒高漲，所以都不停咁食咗好多野，但最後都食剩D菜呀、粟米呀和一碟肥牛…

玩到差不多十一點先打道回府！非常儘興！

記：年初二！

大年初二

今朝07:45就要起身，原因係買了早場09:30飛與大，小靈精去睇"魔法奇緣"，去到先食麥噹噹做早餐，然後入場前買了爆谷做小食，跟住睇完戲後再去吃拉麵，減肥大計於新年期間告吹了。大，小靈精當然吃得一樂也啦！

接著就回家幫媽子預備晚上的開年飯，當然有最傳統嘅：燒肉、雞、魚、發財好事啦，仲有西蘭花炒帶子、鮑魚及响螺煲廋肉湯添！

一家人吃得高高興興，而最精彩嘅節目，就梗係睇煙花啦！可能天氣凍，濕度又低，所以覺得今年嘅煙花特別熣燦，從我家窗戶望出去，都可窺看到一些放得較高的煙花，艷麗程度不比電視上看到的差。

記：年初一！

大年初一

起身同媽子拜個年後，唯一節目就打開電視，睇吓有咩節目，得知今日氣溫得嗰九度，真係希望自己而家响泰國渡新歲。

正準備與媽子吃第一餐午飯時，門鐘响起來，原來是好安答夫婦和大、小靈精過來拜年。由於午飯只準備了齋菜，所以臨時要加開罐頭頂檔。

吃過午飯，佢哋有佢哋繼續拜年活動，我和媽子就往尖沙咀逛，行人多是外來遊客，而香港人則去咗外地做遊客。回程時，適逢因花車巡遊而要封路，好彩對我們無大影响啫。

晚上在家中邊看花車巡遊邊吃晚飯，就係咁就過咗一個平平靜靜的年初一了。

 

年三十晚

年三十晚喇，由於在剛過去嘅星期六已食咗團年飯兼行埋花市，亦因為大、小靈精跟了好安答夫婦返咗婆婆處吃團年飯兼行花市，所以今晚就只跟媽子在家中吃晚飯…

…沒有特別的菜餚…

…沒有趕著要去行花市…

…更沒有了大、小靈精的喧嘩，非常寧靜。要不是媽子要為子時拜神作準備，根本與平日沒有分別。

電視正在播倒數，過了數十個年頭，年年還不是一樣的過！唉！大時節對於我呢D單身一族特別感足良多！

公司附近的食店、麵飽店今日已開始收爐，累我今早買不到麵飽食呢，店舖最快都要初七先啟市，但我們初五就開工大吉，到時點呢！唔通返公司煎蘿蔔糕吃??！或者食麥噹噹啦！

大靈精剛匯報已買了年初二早場戲票，一齊去看"魔法奇緣"。太好了，新年無野做，最好睇吓戲！睇完戲，行完街，又可以返屋企食開年飯喇！

最後謹祝各位網友：心想事成、身體健康！