喜宴

元旦翌日，仍然天寒地凍，當晚仲要去飲，幸好一早攞咗大假唔駛返工，咁又可以連放四日假喇！

被竇暖笠笠，都不願起來，不過起身後第一時間就即塗上第二層蔻丹……天氣乾燥，都乾得算快喇……跟住去轉銀行處理吓財務事情，之後就攪到要食個晏早餐=>Bunch=>常餐，跟住就急急趕返屋企執番眼耳口鼻準備今晚行裝……因為俾面派對，承諾了主人家早一點到場幫吓手??!! ……終於五點半便到達酒樓，當時只有兩家父母，新人及兄弟、姊妹……

我負責做什麼?? 唔！負責將我識嘅人招攬坐埋一枱囉……

開頭得小貓兩三人，坐响度都好悶，唔知做咩好！最後聯同小朋友們玩麻雀……對對碰(即配對)，只用萬子同番子，小朋友順便可以認字吖嘛！

玩咗差不多一粒鐘，見D親朋戚友陸續到達，都唔好意思同小朋友霸住將麻雀枱，咁就各自發展喇！小朋友就滿場走，我就坐埋一邊同無見好耐嘅友人聊天……近呢幾年，身邊嘅朋友嫁得就嫁，娶得就娶，終於淨番我呢D孑然一身嘅人……佢哋覺得我好，我又覺得佢哋好咁囉！

我噚晚就坐呢張枱喇！

終於等到一對新人切蛋糕，話時話都成七點，真有點肚餓呢！

切蛋糕嘅同時，一對新人仲進行祝酒儀式添！

會場一角……

見到靚仔兄弟…

…即眼裡發出閃光，因為見到佢只顧擁著女友="Video"幫新人攝錄，冷落了老婆="Canon G9"，咁我就義務代替兄弟拿起部G9拍攝現場環景，都幾好玩……又影人、又影景、除低個Wide-angle lens影微距、又試ISO 200唔用閃燈，跟ISO 100加閃燈嘅效果……終於玩到部機無電為止！

新人回贈的小禮物，估到是什麼嗎??

九點埋席，到上甜品已經係十一點有多，因為上菜實在太慢喇！攪到部份人仕好貫注地看三色台嘅劇集……兄弟、姊妹們就梗係趁此空檔去玩一對新人啦！

以上嘅相，當然唔係用"Canon G9"影啦！我臨走時已經拜託嗰位兄弟將我D傑作send番email俾我，但唔知佢係咪應咗我就算呢！

元旦日

一個低溫的除夕夜，沒有外出，隨著熱鬧表演至喧嘩倒數踏入2009後，一切又回復平靜，整整四天假期的開始……好一個酣睡的晚上！

元旦日，沒有安排特別的節目，該是平平淡淡地渡過……

沒有回顧，只祈望今年平平穩穩、無風無浪地渡過，唔敢望加人工喇，只要繼續有工返、有糧出就足矣！

今年嘅 2, 3, 6, 8, 9, 11 月都沒有公眾假期，應否考慮在這幾個月放吓大假呢?  不過旅行地點倒不會去得太遠……
=>泰國政局不穩：為著人生安全，不考慮去了……
=>韓環新低：但我對韓國無好感，所以都不考慮……
=>所以餘下來，仍是日本為首選(雖然日圓持續高企)，因京都、九州、沖繩等地，仍有令人著迷的風景！

健康是財富，小病是福，大病請離我遠之！

雖然離春節還有三個多星期，但春節過後，便緊接著小妹的生日，水瓶座的我未決定當日攞大假否? 因節目仍未有著落噃！

但願環繞在大家及自己身邊的所有事情軌跡，都不要離開得太遠啦！